Judges 20

Israel-te in Benjamin-te Sim

1Tua ciangin Dan pan Beersheba dong le Gilead gam panin Israel-te kuankhia uh a, khekhatkhai bangin Mizpah a TOPA mai-ah a kikhawm uh hi. 2Pasian mite kikhopna ah Israel beh makaite zong kikhawm uh a, galkapte namsau tawi tul zali a pha hi. 3(Benjamin-te in Israel-te Mizpah ah a paitoh khit lam a za uh hi.) Tua ciangin Israel-te in, “Hih a cikzethuai thu a pianzia hong gen in,” a ci uh hi. ^a

4 Tua ciangin numei kithatnu pasal Levi-pa in, “Benjamin gama Gibeah ah kei le ka zino a tam dingin ka tung uh hi. 5Zan ciangin Gibeah a mite in ka nung hong zui-in kei thah hong sawm uh a, ka tunna inn hong um uh hi. Ka zino buangawp uh a, a si hi. 6Ka zino pua-in ka semnen khit ciangin Israel luahna kual ciat ah bak khat ciat ka khak hi, bang hang hiam cihleh amaute in hih banga a daihuai lanluatna Israel sungah a gamta uh hi. 7No Israel-te khempeuh aw, tu-in na ngaihsutna uh gen un,” a ci hi. ^b

8 Mi khempeuh khekhatkhai bangin ding zuah uh a, “Kuamah inn ah i ciah kik kei ding hi. Khat beek inn ah a ciah i om peuhmah kei ding hi. 9Ahi zongin Gibeah ah i hih ding hih bang ahi hi: Eite ai in hong lamlah bangin a sim dingin i kuanto ding hi. 10Israel beh khempeuh panin galkapte an pua dingin mi zakhat ciangin sawm, tulkhat ciangin zakhat le tulsawm ciangin tulkhat i sehkhia ding hi. Tua ciangin Benjamin-a Gibeah a ah galkap buppi a tun ciangin Israel sungah a zummawh-zahmawh gamtatna uh i thuaksak zo pan ding hi. 11Tua ciangin Israel mite khempeuh kithutuak uh a, khuapi sim dingin khekhatkhai a bang uh hi.

12 Israel behte in Benjamin behte lakah mi paisak kawikawi uh a, “Na bawl uh mawhna cikzet huai mahmah hi lo hiam? 13Tu-in tua Gibeah a gamtatsiate ka thah theih nading uh leh Israel panin gitlohna i siaksiang theih nadingin tua mi tatsiate hong paikhia un,” a cisak uh hi. ^c

Ahi hangin Benjamin-te in a mipih Israel-te thu a ngai kei uh hi. 14Israel-te do dingin a khuapi tek panun Gibeah ah a kikhawm uh hi. 15Benjaminte in Gibeah a teng a kitengkhia mi zasagih banah a khuapi tek panun namsau tawi mi tul sawmnih le tul guk a kaikhawm pak uh hi. 16Hih galkapte khempeuh lakah a veikhoi, suangtangin samzang khat kap-a a khial lo a kitengkhia mi zasagih a om hi. ^d

17 Benjamin a kisim lo, Israel in gal sim thei mi namsau tawi tul zali a khawm uh hi.

18 Israel-te Bethel a ah paito uh a, Pasian a dong uh hi. Amaute in, “Benjamin-te sim dingin kote kua masa ding ka hi uh hiam? a ci uh hi. ^e

TOPA in, “Judah masa hen,” ci-in a dawng hi.

19 A zing ciangin Israel-te thoin Gibeah kiangah giahphual a sat uh hi. 20Benjamin-te do dingin Israel mite kuankhia uh a, Gibeah a, amaute langkhatah galphual mun a la uh hi. 21Gibeah a Benjamin-te paikhia uh a, tua ni-in Israel-te tul sawmnih le tul nih a satlum uh hi. 22Ahi hangin Israel mite khat le khat kihanthawn uh a, a ni masa ni-a a laknasa uh mun mah ah mun a va la kik uh hi. 23Israel-te pai to uh a nitak dong TOPA mai-ah kapin TOPA a dong uh hi. Amaute in, “Ka sanggamte uh Benjamin-te sim dingin ka kuanto kik ding uh hiam?” a ci uh hi. ^f

TOPA in, “Kuanto unla amaute sim un,” ci-in a dawng hi.

24 Tua ciangin a ninihna ni-in Israel-te in Benjamin-te a neh uh hi. 25Hih hunin amaute do dingin Benjamin-te Gibeah pan a kuankhiat uh ciangin Israel-te namsau tawi sinsen mi tulsawm le giat a sattuk beh lai uh hi.

26 Tua ciangin Israel-te a vekpi un Bethel ah paito uh a, TOPA mai-ah tu-in a kap uh hi. Amaute in tua ni nitak dong an tang uh a, TOPA tungah haltum-a biaknate le kilawmtakna biaknate b a pia uh hi. 27Tuateh Israel-te in TOPA a dong uh hi. (Tua hun lai-in Pasian thukhun singkuangpi, 28Aaron tupa Eleazar’ tapa Phinehas a mai-a nasem den tawh a om hi.) Amaute in, “Ka sanggamte uh Benjamin sim dingin ka kuan kik ding uh hiam, kuan kik lo ding ka hi uh hiam?” ci-in a dong uh hi. ^g

TOPA in, “Kuan un, zing ciangin amaute no khut sungah kong pia ding hi,” ci-in a dawng kik hi. ^h

29 Tua ciangin Israel in Gibeah kimkot ah buksimna a bawl uh hi. 30A ni thum ni-in Benjamin-te sim dingin kuan to uh a, a masa-a a hih bangun Gibeah langah panmun a la uh hi. 31Benjamin-te amau do dingin khuapi panin a kizukkhia khin uh hi. A masa-ate mah bangin, Bethel zuatna lampi le Gibeah lampi tung - lopaang ah Israel-te mi sawmthum bang a sattuk ta uh hi. ⁱ

32 Benjamin-te in, “A masa-a bangin zo ding hi ta hang ei,” a cih laitakun, Israel-te in, “Lehdelhin khuapi pan hawlkhia-in lampi ah hawlmang ni ei,” a ci uh hi.

33 Israel mite khempeuh a omna mun tek panun kuankhia in Baal Tamar ah panmun la uh a, a buksim Israel-te zong Gibeah c nitumna d lam panin a diangkhia uh hi. 34Tua ciangin Israel mi galsim a siampente tulsawm Gibeah ah maisi-in a do uh hi. Kidona nasia lua ahi manin Benjamin-te in a siat dektak lam uh a thei kei uh hi. 35TOPA in Israel mai-ah Benjamin zo a, tua ni-in Israel-te in Benjamin-te namsau tawi cingteng 25,100 a satlum uh hi. 36Tua ciangin Benjamin mite in amaute a guallel ahilam a kithei uh hi. ^j

Tu-in Israel mite in Gibeah kianga a koih uh a buksimte muang uh ahi manin Benjamin-te a awn phot uh hi. 37A buksimte pawlin Gibeah sung thakhat in sim uh a, kithehzakin khuapi bup a vatlum khin uh hi. 38Khuapi panin meii bangin meikhu lianpi kitunsak ding Israel mite le a buksimte in a geelsa uh hi a, 39tua ciangin Israel-mite galphual ah kiheii kik dinga a geel uh ahi hi. ^k

Benjamin-te in Israel-te (sawmthum bang) liamsakin thah ding kipan uh a, “I kido masa bangin zo ding hi ta hang,” a ci uh hi. 40Ahi hangin khuapi sungah meikhu lompi a khut ciangin Benjamin-te kihei uh a, a khuapi buppi kangkhu vantung lama kitungto a mu uh hi. 41Tua ciangin Israel mite in amaute sim uh a, Benjamin in a tungah siatna tungta cih thei ahi manin a linglawng uh hi. 42Tua ciangin Israel-te mai pan sehnel-gam lam manawhin a tai uh hi. Ahi hangin gal panin a suakta tuan kei uh hi. Tuateh khuapite pana kuan Israel mite in tua lai-ah amaute a sattuk uh hi. 43Amaute in Benjamin-te pum-um uh a, nisuahna-lam Gibeah kiang mahmah dong ah amaute khiangin baihtakin e a man uh hi. 44Benjamin-te tulsawm le giat tuk uh a, a vekun galdo siam vive ahi uh hi. 45Amaute kihei-in sehnel-gam lam manawhin Rimmon suangpi-a a taina uh lamdungah Israel-te in mi tulnga a sattuk uh hi. Amaute in Benjamin-te nung panin Gidom dong delh uh a, tul nih a sattuk beh lai uh hi.

46 Tua ni-in Benjamin-te namsau tawi cingteng tulsawmnih le tulnga tuka, a vekpi-in galhang vive ahi uh hi. 47Ahi hangin sehnel-gam lamah mi zaguk kihei-in Rimmon suangpi ah tai uh a tua lai-ah kha li sung a om uh hi. 48Israel mite Benjamin-te kiangah kileh kik uh a, khuapite khempeuh ah a mihing a ganhingin a muh peuhpeuh uh namsau-in a vatgawp uh hi. A paina uh khuapi khempeuh mei-in a hal uh hi. ^l